Innlent

Telur ólíklegt að álverið verði 360 þúsund tonna

trölladyngja Eitt þeirra svæða sem náttúruverndarsamtök telja að geti eyðilagst verði álver í Helguvík 360 þúsund tonna. Réttara væri að friða svæðin en huga að nýtingu þeirra.
trölladyngja Eitt þeirra svæða sem náttúruverndarsamtök telja að geti eyðilagst verði álver í Helguvík 360 þúsund tonna. Réttara væri að friða svæðin en huga að nýtingu þeirra.

Sjö umhverfissamtök, þar með talið Græna netið sem tilheyrir Samfylkingunni, hafa sent ríkisstjórninni áskorun um að gerð verði rækilega grein fyrir hvaða háhitasvæði og vatnsföll verður nauðsynlegt að virkja til að afla orku fyrir 360 þúsund tonna álver í Helguvík. Samtökin telja að slíkri orkuvinnslu fylgi ráðstöfun fjölmargra dýrmætra hverasvæða og vatnsfalla, sem réttara væri að vernda en nýta.

Katrín Júlíusdóttir iðnaðarráðherra segir stjórnvöld ekki hafa skuldbundið sig til neinnar orkuöflunar fyrir álver í Helguvík. Fyrir liggi samningar á milli Norðuráls og Orkuveitu Reykjavíkur annars vegar og Hitaveitu Suðurnesja hins vegar. Þar sé aðeins rætt um orku fyrir 250 þúsund tonna álver. Ekki séu leyfi fyrir stærra álveri.

Ágúst Hafberg hjá Norðuráli segir að enn sé stefnt að 360 þúsund tonna álveri. Enn standi það sem hann sagði í samtali við Fréttablaðið í nóvember: „Við viljum vera þokkalega vissir um að við fáum alla áfangana.“ Hann telur líta vel út með orkuöflun fyrir svo stórt álver.

Svandís Svavarsdóttir umhverfisráðherra segir að þessari áskorun verði að sjálfsögðu svarað, líkt og öðrum erindum sem beint er til hennar. Hún þurfi ráðrúm til að svara erindinu.

„Þetta samræmist ágætlega þeirri sýn sem stundum er kennd við sjálfbæra þróun að allar upplýsingar þurfi að liggja á borðinu.“ Sjálf hafi hún kallað eftir svipuðum upplýsingum sem stjórnarmaður Orkuveitunnar.

Þórunn Sveinbjarnardóttir, formaður umhverfisnefndar Alþingis, segir að því sé ekki fullsvarað hvaðan orkan eigi að koma, verði ráðist í annan áfanga álversins.

„Mér finnst sjálfsagt, og það gæti gert umræðunni gott, að fá skýrt yfirlit um það frá orkufyrirtækjunum og sveitarfélögunum hvað þau ætlast til í þeim efnum.“

Spurð hvort hún telji rétt að stækka álverið í 360 þúsund tonn segir Þórunn:

„Það er bara annað og stærra viðfangsefni og það er margt sem bendir til að það verði aldrei ráðist í þá framkvæmd.“

Iðnaðarráðherra segist munu taka afstöðu til stækkunar verði um hana sótt, fyrst sé að klára fyrsta áfangann. Hún muni taka afstöðu með tilliti til annarrar uppbyggingar. Menn þurfi að fara að öllu varlega og ekkert launungarmál sé að stjórnvöld vilji setja eggin í fleiri en eina körfu.

kolbeinn@frettabladid.is



Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.