Þrengt að íslenskri tungu

„Ef þessi þróun heldur áfram næstu áratugi og námskeiðum og heilum námsbrautum á ensku fjölgar blasir við að verulega mun þá þrengt að íslenskri tungu í háskólasamfélaginu á Íslandi. Svo gæti farið að íslenska yrði ekki lengur gjaldgeng í íslenskum háskólum og yrði að víkja þar fyrir ensku. Við það myndi staða íslenskrar tungu í íslensku samfélagi veikjast," segir í ályktun Íslenskrar málnefndar.

Samkvæmt lögum er nefndinni skylt að álykta árlega um stöðu íslenskrar tungu og að þessu sinni er lögð áhersla á málnotkun í íslensku háskólasamfélagi.

Í mörgum háskólagreinum er mikill meirihluti námsefnis á erlendum málum en svo hefur reyndar verið um langa hríð. Á síðustu árum hefur hlutur ensku vaxið mjög og jafnframt dregið úr notkun námsefnis á öðrum erlendum málum. Svo er komið að ætla má að námsefni á ensku sé um og yfir 90 af hundraði alls námsefnis á háskólastigi á Íslandi.

„Mesta breytingin er þó líklega innan sjálfrar kennslustofunnar því að mjög hefur færst í vöxt að kennsla og verkefnavinna fari fram á ensku, bæði í grunnnámi og framhaldsnámi."

Í ályktun nefndarinnar segir að alþjóðlegir straumar séu vitaskuld ómissandi þáttur í þróttmiklu háskólastarfi og fengur sé að bæði kennurum og nemendum utan úr heimi. „Sú spurning hlýtur þó að vakna hvort slík alþjóðleg samskipti þurfi í öllum tilvikum að vera á kostnað íslenskunnar."

Þá segir í ályktuninni: „Um leið og íslenska hættir að vera gjaldgeng í háskólasamfélaginu stöðvast vöxtur hennar á sviði vísinda og fræða."