Heimdallur spyr hvort netlögga VG sé að vakna til lífsins

Heimdallur, félag ungra sjálfstæðismanna í Reykjavík gagnrýnir hugmyndir Katrínar Jakobsdóttur, menntamálaráðherra, sem þeir segja að boði umfangsmikla upplýsingasöfnun ríkisins um netnotkun landsmanna við fyrirhugaða endurskoðun höfundarréttarlaga. Ætlunin er að kortleggja umsvif ólöglegs niðurhals á netinu.

Að mati Heimdalls leysir það engan vanda vanda að opinberir starfsmenn taki það að sér að kortleggja internetið og netnotkun landsmanna. „Áform ráðherrans verða enn síður traustvekjandi þegar rifjað er upp að forystumaður sama flokks nefndi þá hugmynd ekki fyrir alls löngu að komið yrði á fót netlögreglu til að sinna eftirliti á vefnum," segir ennfremur í tilkynningu frá Heimdalli.

„Rétthafar hugverka vilja meina að þeir verði af miklum tekjum vegna ólöglegrar dreifingar á netinu," segir einnig. „Í stað þess að ganga á varhugaverðan hátt á friðhelgi einkalífs almennings, væri nær að leita leiða til að gefa fólki tækifæri til að sækja sér efni á netinu á löglegan hátt með því að greiða fyrir það. Kortlagning stjórnvalda á netnotkun landsmanna er í það minnsta ekki rétta leiðin."