Rooney vill ekkert baul á Terry

„Hann er ekki lengur með fyrirliðabandið en er samt frábær leikmaður og mikill leiðtogi," segir Wayne Rooney um John Terry, samherja sinn hjá enska landsliðinu.

Rooney vill að Englendingar sýni Terry stuðning en hann missti fyrirliðatignina fyrir framhjáhaldsmál eins og frægt er.

„Ég hef upplifað það að spila leiki þar sem baulað er á samherja mína á Wembley. Það er ekki góð tilfinning og gefur röng skilaboð. Ég vona að hann fái góðar móttökur. Það styttist í HM og stuðningsmenn verða að standa með okkur," sagði Rooney.

Englendingar leika vináttulandsleik gegn Egyptalandi á miðvikudag.