Vill Hauk í 4 ára fangelsi

Helgi Magnús Gunnarsson, saksóknari efnahagsbrota, krefst fjögurra ára fangelsisdóms yfir Hauki Þór Haraldssyni, fyrrverandi framkvæmdastjóra rekstrarsviðs Landsbankans, sem ákærður er fyrir að draga sér 118 milljónir. Sækjandi og verjandi fluttu mál sitt fyrir dómi í gær.

Haukur færði féð af reikningi félagsins NBI Holdings 8. október 2008 inn á eigin reikning. Félagið var í eigu sjálfseignarsjóðs á Guernsey og hafði á árum áður verið notað af Landsbankanum til fjárfestinga. Haukur var prókúruhafi þess og eini Íslendingurinn í stjórn í seinni tíð.

Hann hefur sjálfur sagst hafa ætlað að bjarga fénu frá því að brenna upp í hruninu.

Helgi Magnús sagði að í miðju hruni hefðu verið „kjöraðstæður til að gera svona færslu án þess að nokkur tæki eftir henni". Ringulreiðin hafi verið mikil og illmögulegt að fylgjast með öllum fjármagnshreyfingum. Í því ljósi hafi áhættan af því að millifærslan kæmist upp ekki verið svo mikil að hún girti fyrir brotið, eins og verjandi Hauks hefur áður haldið fram.

„Er eitthvað grunsamlegra fyrir bankastarfsmann en að færa peninga viðskiptamanns inn á eigin reikning? Það hlýtur að hafa hrópað á hann að upplýsa samstarfsmenn sína um þetta," sagði Helgi Magnús. Það hafi Haukur hins vegar ekki gert. „Hann greindi engum frá þessu heldur lá á þessum millifærslum - þessu fé - í mánuð."

„Afstaða ákæruvaldsins í þessu máli hefur valdið mér nokkrum heilabrotum," sagði Gestur Jónsson, verjandi Hauks, og benti á það sem hann sagði grundvallaratriði í málinu: að Haukur hefði sem prókúruhafi haft fulla heimild til að millifæra féð að vild, og að ekkert benti til þess að hinn stjórnarmaður félagsins og eigandi þess, sjálfseignarsjóðurinn The 1886 Trust, hefðu nokkuð við millifærsluna að athuga. „Ef þeir gera enga athugasemd við það þá er mjög skrítið að Haukur skuli sæta ákæru fyrir fjárdrátt," sagði Gestur.

Þar fyrir utan hefði hann enga tilraun gert til að hylja slóð sína eða snerta á fénu þar sem það lá á sérgreindum bankareikningi hans.

stigur@frettabladid.is