Sagði Elínu ekkert þrátt fyrir tvo fundi

Haukur Þór Haraldsson, fyrrverandi framkvæmdastjóri rekstrarsviðs Landsbankans, sem ákærður er fyrir fjárdrátt, segir ákæruna algjörlega tilefnislausa. Þetta kom fram við aðalmeðferð í málinu í gær.

Haukur er ákærður fyrir að millifæra 118 milljónir króna af reikningi félagsins NBI Holdings Ltd. 8. október 2008 inn á eigin reikning. Félagið, sem var í eigu sjálfseignarsjóðs á Guernsey og laut stjórn Hauks, hafði legið í dvala í hálfan áratug, en var áður notað af bankanum til að halda utan um eignarhluti í fjármálafyrirtækjum sem hefðu komið til frádráttar eigin fjár bankans ef þeir hefðu verið í efnahagsreikningi hans. Haukur segist hafa ætlað að bjarga fénu frá því að verða að hverri annarri kröfu í þrotabú bankans síðar meir.

Einkum var tekist á um þrennt: hvort Haukur hafi haft ástæðu til að óttast um féð á reikningum vegna óvissunnar sem uppi var í hruninu um erlendar innstæður í íslenskum bönkum, hvort hann hafi gert það sem í hans valdi stóð til að upplýsa yfirboðara sína um millifærsluna og hvort hann hafi mátt vita að millifærslan myndi uppgötvast í eftirlitskerfum bankans.

Ekki fékkst botn í neitt af framantöldu þrátt fyrir mikinn fjölda vitna, en þó virðist ljóst að áhyggna gætti víða um erlendu innstæðurnar og að Haukur reyndi ítrekað að ná tali af Elínu Sigfúsdóttur bankastjóra til að greina henni frá millifærslunni. Á hinn bóginn náði hann tali af henni í tvígang í einrúmi en sagði henni þá ekkert. Elín sagði við réttarhöldin mögulegt að hún hefði þá ýtt Hauki frá sér vegna anna.

Þá kom fram að Haukur lét hinn stjórnarmann NBI Holdings ekki vita af millifærslunni og lét eyðileggja reikning félagsins hjá Landsbankanum að millifærslunni lokinni. Sagði hann það þó eðlilegt verklag að láta loka tómum reikningum.

Gestur Jónsson, verjandi Hauks, var gagnrýninn á vinnubrögð lögreglu, og greindi meðal annars frá því að lögregla hefði aldrei haft samband við aðra stjórnarmenn NBI Holdings, né vörslumenn sjálfseignarsjóðsins sem átti félagið, til að kanna hug þeirra til millifærslunnar. stigur@frettabladid.is