David Moyes: Ég er eitt stórt bros í kvöld

David Moyes, stjóri Everton, var að sjálfsögðu í skýjunum eftir 2-1 sigur Everton á Manchester City í kvöld en Everton-liðið hafði ekki unnið deildarleik síðan í lok október.

„Ég er eitt stórt bros í kvöld. Mér líður stórkostlega," sagði David Moyes við BBC strax eftir leikinn.

„Við spiluðum frábærlega fyrstu 20 mínútur leiksins og í lokin náðum við að landa þremur virkilega, virkilega góðum stigum," sagði Moyes.

„Tim Cahill gefur allt sitt í leikina og það er hann sem drífur baráttuanda liðsins áfram. Við höfum spilað honum hingað og þangað á vellinum og hann er alltaf klár í slaginn," sagði Moyes um Ástralann snjalla sem skoraði fyrra markið og lagði upp það síðara.

„Hann hefur frábært hugarfar og fórnar öllu sínu fyrir þetta lið," sagði Moyes kátur.