Bjarni vill ríkisstjórnina burt

Formaður Sjálfstæðisflokksins vill að ríkisstjórnin fari frá völdum. Hann segir að hún ráði ekki verkefnið sem henni sé ætlað að sinna og þvælist þess í stað fyrir. Nýleg skoðanakönnun sýni það.

Sjálfstæðisflokkurinn bætir við sig miklu fylgi á kostnað stjórnarflokkanna samkvæmt skoðanakönnun Fréttablaðsins í dag. Alls segjast 40,3% styðja flokkinn. Samfylkingin nýtur nú stuðnings 23,1% kjósenda, VG 20,6% og Framsóknarflokkurinn 13,3%. Aðrir njóta minni stuðnings. Einnig var spurt um afstöðu til ríkisstjórnarinnar. Alls sögðust 38,9% þeirra sem afstöðu tóku styðja ríkisstjórnina, en 61,1% ekki.

„Við höfum talað fyrir hlutum sem að sameina þjóðina á meðan að ríkisstjórnin hefur lagt áherslu á hluti sem sundra henni," segir Bjarni Benediktsson, formaður Sjálfstæðisflokksins. Hann segir að ríkisstjórnin hafi brugðist í Icesavemálinu, sett aðild að Evrópusambandinu á dagskrá án þess að pólitísk forysta sé fyrir málinu né stuðningur hjá þjóðinni og brugðist seint og illa við vanda fyrirtækja og heimilanna.

Bjarni segir brýnt að ríkisstjórnin styðji við verðmætasköpun. „Við þurfum horfast í augu við vandann og ráðast á hann. Á sama tíma erum við með ríkisstjórn þar sem hver höndin er upp á móti annarri," segir Bjarni sem telur að ríkisstjórnin ráði ekki við verkefnið. „Ríkisstjórnin hefur verið að þvælast fyrir, hún er búin að tapa trausti og hún á að segja sig frá verkinu."