Lífeyrissjóðirnir tapa 6-8 milljörðum á þroti Byrs

Lífeyrissjóðirnir tapa sex til átta milljörðum króna á þroti Byrs sparisjóðs. Erlendir kröfuhafar höfnuðu tilboði ríkisins um fjárhagslega endurskipulagningu Sparisjóðsins í Keflavík og Byrs í tvígang. Stofnfjáreigendur tapa öllu sínu og ríkið verður eigandi sjóðanna.

Ríkið yfirtók Sparisjóðinn í Keflavík og Byr í dag og lagði þeim til um 1,7 milljarða króna í eiginfjárframlag. Fjármálaeftirlitið flutti eignir og innlán sparisjóðanna í ný fjármálafyrirtæki í eigu ríkisins. Um er að ræða sambærilega aðgerð og þegar ríkið yfirtók viðskiptabankana þrjá haustið 2008, þó herslumunur sé á.

Niðurstaðan varð þessi eftir að erlendir kröfuhafar sparisjóðanna höfnuðu tilboði um fjárhagslega endurskipulagningu þeirra.

Yfirtaka ríksins á sparisjóðunum þýðir að stofnfjáreigendur tapa öllu sínu. „Þeir eru því miður búnir að tapa öllu í þessum tveimur sparisjóðum og munu fyrirsjáanlega tapa mestu af sínu í flestum þessara smærri sparisjóða," segir Gylfi Magnússon, efnahags- og viðskiptaráðherra.

Staðan er sérstaklega slæm fyrir þá stofnfjáreigendur sem tekið hafa lán í tengslum við stofnfjáraukningu sparisjóðanna.

En þrot Byrs og Sparisjóðsins í Keflavík er áfall fyrir fleiri en stofnfjáreigendur. Í tilfelli Byr eiga innlendir kröfuhafar mikilla hagsmuna að gæta, en kröfur þeirra nema um 15 milljörðum króna. Talið er að lífeyrissjóðirnir tapi á bilinu 6 til 8 milljörðum króna á þroti Byrs, en sú leið sem var farin í gærkvöldi var talsvert áfall fyrir lífeyrissjóðina, sem töldu hagsmunum sínum betur borgið með fjárhagslegri endurskipulagningu.

Lífeyrissjóðirnir sem tapa mest á þroti Byrs eru LSR og Gildi lífeyrissjóður.