Getum margt lært af Íslandi

Þýskaland Þýska þingið samþykkti með yfirgnæfandi meirihluta að heimila Evrópusambandinu að hefja aðildarviðræður við Ísland.

Þar með er ekkert því til fyrirstöðu að ráðherraráð Evrópusambandsins taki afstöðu til þess hvort hefja eigi aðildarviðræður við Ísland.

Í umræðum þýska þingsins, sem stóðu í klukkustund, sagði Michael Link, talsmaður frjálsra demókrata í Evrópumálum, að Evrópusambandið geti lært ýmislegt af Íslandi, og nefndi sem dæmi þá áherslu sem Ísland leggur á sjálfbærar fiskveiðar.

„Við verðum að gæta vel að því að í aðildarviðræðum fari Evrópusambandið ekki að troða neinu upp á Íslendinga á þeim sviðum þar sem þeir hafa náð langt.“

Á hinn bóginn lagði hann áherslu á að ekkert verði gefið eftir þegar að hvalveiðum kemur.

Fulltrúar allra flokka sögðust fagna aðild Íslands að Evrópusambandinu.

Þýskaland er eina aðildarland Evrópusambandsins sem notfærir sér heimild í Lissabonsáttmála sambandsins um að þjóðþingið þurfi að veita samþykki sitt áður en ráðherra landsins greiðir atkvæði um aðildarviðræður í ráðherraráðinu.

- gb