Góð kjörsókn styrkir samningsstöðuna

Stjórnarandstaðan leggur mikið upp úr góðri kjörsókn í þjóðaratkvæðagreiðslunni á morgun og segir hana styrkja samningsstöðu Íslendinga í Icesave málinu.

Ef marka má kannanir er nokkuð ljóst að Icesave lögin verða kofelld af þjóðinni í þjóðaratkvæðagreiðslunni á morgun. Það verður hins vegar kjörsóknin sem segir til um hvað þjóðin er upptekin af málinu og umhugað að koma skoðun sinni á framfæri.

„Hún er gríðarlega mikilvæg og sérstaklega uppá að fá betri samning," segir Birgitta Jónsdóttir þingflokksformaður Hreyfingarinnar. Þá sé þjóðaratkvæðagreiðslan mikilvæg til að sýna umheiminum að Íslendingar séu hughrakkir og vilji nota sín lýðræðislegu réttindi, sem margir öfundi þá af.

Ekki eigi að taka mark á úrtölum um að atkvæðagreiðslan skipti ekki máli. Þá eigi að vera hægt að sinna endurreisn efnahagslífsins þótt samningar takist ekki á næstunni.

„Ég tel að það skipti meginmáli að það komi skýr skilaboð út úr þessari þjóðaratkvæðagreiðslu," segir Bjarni Beneditksson formaður Sjálfstæðisflokksins. Þar skipti niðurstaðan máli og svo auðvitað kjörsóknin og hann skori á fólk að mæta á kjörstað.

Bjarni segist vona að samningarnir verði felldir. Það sem taki við sé ferli þar sem ríkin reyni aftur að leiða fram niðurstöðu sem vonandi verði sanngjörn í þetta sinn.

Sigmundur Davíð Gunnlaugsson formaður Framsóknarflokksins segir skipta miklu máli að þjóðaratkvæðagreiðslan heppnist vel af ýmsum ástæðum. „Í fyrsta lagi er þetta fyrsta þjóðaratkvæðagreiðslan á lýðveldistímanum og hún mun hafa mikil áhrif á framhald þessarar lýðræðisþróunar beins lýðræðis. Svo þurfum við að senda sterk og skýr skilaboð út á við um afstöðu Íslendinga og skipta miklu máli um framhald samningaviðræðna," sagði Sigmundur Davíð.

Sigmundur kannast við að margir vilji meina að enginn samningur sé nógu góður fyrir hann og Framsóknarflokkinn. Slíkar fullyrðingar eigi sér hins vegar enga stoð í raunveruleikanum.