Vona að viðræður haldi áfram eftir helgi

Leiðtogar stjórnarflokkanna telja að verulega hafi dregið saman með Íslendingum og viðsemjendum þeirra í Icesave deilunni og vona að samningaviðræður geti haldið áfram strax eftir helgina.

Samningaviðræðum Íslendinga, Breta og Hollendinga er lokið í bili án samkomulags. Leiðtogar stjórnarflokkanna segjast vongóð um að viðræðurnar geti hafist að nýju strax eftir helgi. Þau segja brýnt að ná samningum sem fyrst.

„Við höfum mjög lítinn tíma til stefnu vegna þess að áhrifin af þessu eru mikil á efnahags- og atvinnulífið og þá uppbyggingu sem bíður að við náum þar niðurstöðu," sagði Jóhanna Sigurðardóttir forsætisráðherra að loknum ríkisstjórnarfundi í morgun. Núgildandi Icesave lög séu í raun fallin úr gildi þar sem mun betra tilboð liggi á borðinu. Forsætisráðherra ætlar því ekki að mæta í þjóðaratkvæðagreiðsluna á morgun, enda engir skýrir kostir í boði. Með því sé hún ekki að hvetja aðra til að gera slíkt hið sama.

„Það er hver og einn sem tekur sitt val í þessu efni. Þetta er mitt val og það getur verið að fleiri taki það. Ég yrði að minnsta kosti ekki hissa á því vegna þess að mér finnst borðleggjandi hvernig þessi þjóðaratkvæðagreiðsla mun fara," sagði Jóhanna. Henni þætti dapurlegt að fyrsta þjóðaratkvæðagreiðslan frá stofnun lýðveldisins skuli vera með þessum hætti.

Steingrímur J. Sigfússon fjármálaráðherra sagðist svipaðrar skoðunar og forsætisráðherra. „Til þess að svona kosning þjóni í raun tilgangi þarf hún að mínu mati að uppfylla tvennt. Það þurfa að vera í boði einhverjir skýrir valkostir sem valið er um og það þarf að vera möguleg einhver lausn á einhverju viðfangsefni. Hvorugt er í boði í þessu tilviki eins og nú er málum háttað," sagði Steingrímur.

Þegar hann var spurður að því að ef sú staða kæmi upp að samningur lægi fyrir sem stjórnarflokkarnir gætu sætt sig við en hluti eða öll stjórnarandstaðan gæti ekki sæst á, myndi ríkisstjórnin leggja slíkan samning fyrir Alþingi, svaraði Steingrímur: „Það er of snemmt að ræða þetta á þeim forsendum. Við skulum bara taka hvern dag fyrir sig. En ég bara skil þá eftir þá spurningu í loftinu hér mönnum til umhugsunar: Hvernig halda menn að það gangi að semja ef einhverjir eru í samningaliðinu sem vilja ekki semja".