Leikstjóri dæmdur fyrir að skalla mann

Leikstjórinn og tónlistarmaðurinn Ágúst Bent Sigbertsson var dæmdur í 30 daga skilorðsbundið fangelsi fyrir líkamsárás árið 2008 í Héraðsdómi Reykjavíkur í morgun.

Ágúst, sem leikstýrir þáttunum Steindinn okkar, sem hefur slegið eftirminnilega í gegn á Stöð 2, er dæmdur fyrir að hafa skallað og slegið annan mann eftir orðaskak á skemmtistaðnum Prikinu með þeim afleiðingum að framtennurnar hans losnuðu.

Í dómsorði segir fórnarlamb Ágústs að þeir hefðu lent í rifrildi. Fórnarlambið vill meina að það sem hafi orðið til þess að Ágúst réðist á hann hafi verið særandi ummæli um að „Breiðholt væri alvöru, en Árbærinn væri hálfvegis".

Þessu neitar Ágúst og sakar fórnarlambið um að hafa slegið sig fyrst og þeir hafi svo lent í nokkurskonar glímuátökum. Samkvæmt vitni, sem var vinur fórnarlambsins, þá á Ágúst að hafa fylgt honum út af skemmtistaðnum. Svo skallaði hann manninn á Ingólfsstrætinu.

Í ljósi þess hversu langt síðan brotið átti sér stað, og óeðlilega langa málsmeðferð að mati dómsins, þá er dómur Ágústs skilorðsbundinn og fellur niður eftir tvö ár haldi hann almennt skilorð.

Ágústi er svo gert að greiða fórnarlambinu tæplega 400 þúsund krónur í miskabætur.