Færri og stærri heilsugæslustöðvar gætu skilað tíu prósenta sparnaði

Til að tryggja að fólk leiti að jafnaði fyrst til heilsugæslunnar, áður en það fer til dýrari sérfræðinga, er lagt til að leggja mishá komugjöld á sjúklinga í heilbrigðiskerfinu, í vinnuskýrslu um eflingu heilsugæslunnar. Fækkun og stækkun heilsugæslustöðva á höfuðborgarsvæðinu gæti skilað tíu prósenta sparnaði.

Eins og fram hefur komið leggur nefndin meðal annars til í drögum að skýrslu að koma á tilvísanaskyldu innan þriggja ára, til þess að beina fólki til heimilislækna fyrst sem síðan veiti því tilvísun til sérfræðinga ef þörf þykir. Ekki er búið að útfæra þessa tilvísanaskyldu í skýrslunni. En til að beina fleirum til heimilislækna er auk þess bent á að í stað tilvísanaskyldu eða jafnhliða henni mætti stýra fólki inn á heilsugæsluna með því að leggja mishá komugjöld á sjúklinga.

Ýmsar fleiri hugmyndir eru reifaðar í skýrslunni, meðal annars að fækka heilsugæslustöðvum á höfuðborgarsvæðinu, þannig að í stað 5-7 læknastöðva taki við allt að 15-20 læknastöðvar. Markmiðið er hvort tveggja að gera kerfið skilvirkara en líka að spara.

Álfheiður Ingadóttir, heilbrigðisráðherra, segir að við sameiningar stofnana sé miðað við að um 10% sparist. Hún segir að einnig þurfi að horfa til húsnæðiskosts stöðvanna því einhverjar þeirra þurfi hugsanlega að flytja. „Það kann að fylgja því einhver kostnaður."

Endanleg skýrsla á að koma út síðar í haust en þangað til er almenningur og aðrir hvattir til að senda athugasemdir við tillögurnar á netfangið postur@hbr.stjr.is.