Tjá sig ekki um mál Steingríms Ara

Heilbrigðisráðuneytið og Álfheiður Ingadóttir ráðherra ætla ekki að tjá sig um mál Steingríms Ara Arasona forstjóra Sjúkratrygginga Íslands, en Steingrímur skýrði frá því fyrr í dag að ráðherra ætli að áminna hann. „Heilbrigðisráðuneytið mun ekki tjá sig frekar um samskipti við forstjóra Sjúkratrygginga Íslands í þessu máli á vettvangi fjölmiðla," segir í tilkynningu. Þá er bent á að Steingrímur hafi lögformlegan andmælarétt til 13. apríl næstkomandi og er málið nú í þeim farvegi.

„Ráðuneytið vonast til að málið hljóti farsælan endi -- sem meðal annars felst í því að þeir einstaklingar sem reglugerðirnar fjalla um njóti þeirra réttinda til tannlækninga og tannréttinga sem endurspeglast í anda reglugerðanna," segir að lokum um leið og bent er á þær reglugerðir sem tengjast málinu.

1) „Endurgreiðslur vegna fæðingargalla í munnholi hækkaðar verulega," sem birtist 5. mars 2010.

2) „Umsóknarfrestur um endurgreiðslu umtalsverðs tannlæknakostnaðar framlengdur," sem birtist 29. janúar 2010.

3) „Auknar niðurgreiðslur vegna alvarlegustu tannviðgerðanna," sem birtist 18. janúar 2010.