Fengu fótboltalúxus að láni

Björgólfur Guðmundsson skilur eftir sig 30 milljóna króna skuld hjá knattspyrnufélaginu West Ham vegna lúxusmeðferðar Landsbankamanna á heimaleikjum félagsins.

West ham birti ársreikninga fyrir árið 2008 og níu í gær og þar kemur fram að félagið veitti gestum frá Landsbankanum svokallaða heimaleikja-gestrisni. Platínum útgáfan af slíkri gestrisni er stúka eða borð fyrir tíu í fyrirmennastofu, með einstökum þægindum og óviðjafnanlegu útsýni, eins og segir á heimasíðu West ham, lúxusbólstruð sæti í stjórnendastúku eða á einkasvölum - kampavín og snittur við komuna, einkaþjónustustúlku, matseðil fyrir matgæðinga, og tvö ókeypis bílastæði á góðum stað.

Þótt Björgólfur hafi um hríð átt West ham með húð og hári þá þurftu gestir hans á vegum Landsbankans að greiða fyrir svona lúxusmeðhöndlun á meðan þeir nutu þess að horfa á karlmenn sparka bolta á leikjum. Herlegheitin kostuðu Landsbankann 31,5 milljón króna. Nema Landsbankinn borgaði ekki, heldur fékk lúxusinn að láni. Síðan fór Landsbankinn í þrot - og því ósennilegt að lúxusinn sem útrásarvíkingar og vinir þeirra fengu á fótboltaleikjum West ham verði nokkurn tímann greiddur.