Stöðva enn nýsmíði Hrafns í Laugarnesi

Framkvæmdir við ný mannvirki á og við lóð Hrafns Gunnlaugssonar, kvikmyndaleikstjóra í Laugarnesi, hafa verið stöðvaðar.

Starfsmaður byggingarfulltrúans í Reykjavík fór í vettvangskönnun í Laugarnesið um miðjan febrúar eftir að athugasemd barst embættinu um að hús hefði verið steypt upp í fjöruborðinu neðan við hús Hrafns í Laugarnestanga 65.

„Kom í ljós að framkvæmdir eru í gangi á staðnum sem ekki eru leyfi fyrir, en búið er að byggja skúr eða skýli niðri við flæðarmál. Einnig eru framkvæmdir í gangi við annað hús út við lóðamörk, en búið er að slá upp fyrir veggjum og steypa að hluta veggi og verið er að undirbúa steypu á gólfi,“ segir í bréfi sem byggingarfulltrúi skrifaði Hrafni fyrr í þessum mánuði.

Í bréfinu til Hrafns kemur fram að ekkert byggingarleyfi hafi verið gefið út fyrir fyrrnefndum framkvæmdum og að engir uppdrættir hefðu borist byggingarfulltrúa. Honum var því tilkynnt um að „allar framkvæmdirnar, hverju nafni sem þær nefnast, hafi verið stöðvaðar“.

Bréfið til Hrafns var lagt fyrir síðasta fund skipulagsráðs Reykjavíkur sem staðfesti ákvörðun byggingarfulltrúans um stöðvun framkvæmda. Hrafn hefur nú frest til 18. mars til að gefa skýringar á nýsmíðinni í Laugarnesi. Það er síðan í höndum skipulagsráðs að ákveða framhald málsins, til dæmis hvort mannvirkin verði fjarlægð á kostnað Hrafns. Reyndar hefur Hrafn áður lagt út í ýmsar ósamþykktar framkvæmdir, bæði innan sinnar eigin lóðar og utan, án þess að hafa þurft að sæta því að þær væru rifnar.

„Lóðafrágangurinn hjá honum er ekki í samræmi við samþykkta uppdrætti. En það er búið að vera mikið annríki hjá öllum sem eiga að vera að fylgjast með þessu, embætti byggingarfulltrúa og fleirum,“ útskýrir Magnús Sædal byggingarfulltrúi.

Ekki náðist í Hrafn Gunnlaugsson í gær.

gar@frettabladid.is