Fellaini líklega frá vegna meiðsla í hálft ár

Everton hefur orðið fyrir miklu áfalli því staðfest hefur verið að miðjumaðurinn Marouane Fellaini verður frá vegna meiðsla í allt að því sex mánuði.

Knattspyrnustjórinn David Moyes hjá Everton segir að Belginn Fellaini þurfi að gangast undir aðgerð á ökkla vegna meiðslanna sem hann varð fyrir eftir tæklingu Sotirios Kyrgiakos í grannaslag Everton og Liverpool fyrr í þessum mánuði.

„Staðan á honum er ekki góð og hann þarf að gangast undir aðgerð. Meiðsli Fellaini eru svipuð og þau sem Robin van Persie er að eiga við hjá Arsenal," sagði Moyes í viðtali við opinbera heimasíðu Everton.