Bregst við dómi með nýju frumvarpi

Eygló Harðardóttir hefur ákveðið að leggja fram frumvarp til laga á Alþingi um frestun nauðungarsölu og flýtimeðferð einkamála vegna erlendra lána.

Eygló segir að gífurlegir hagsmunir séu af því að fá úr því skorið sem allra fyrst hvort gengistryggðir lána- og kaupleigusamningar séu löglegir eða ekki. Yfir 40.000 einstaklingar séu með fjármögnun bifreiðar í erlendri mynt að upphæð yfir 115 milljarðar króna.

„Þá upplýsti félagsmálaráðherra að gengisbundin skuldabréf til heimila voru um 315 milljarðar króna í lok september 2008 og voru 107 milljarðar skilgreindir sem erlend íbúðalán. Þá eru ónefndir sambærilegir lánasamningar fyrirtækja," segir Eygló.

Eygló segist hafa boðið þingmönnum allra flokka að gerast meðflutningsmenn að málinu svo hægt verði að aflétta sem fyrst réttaróvissu, takmarka hugsanlega skaðabótaábyrgð málsaðila og tryggja hraða og réttláta meðferð þessara mála í dómskerfinu.