Rafael Benitez: Mascherano er lykilmaðurinn fyrir okkur

Rafael Benitez, stjóri Liverpool, er á því að Javier Mascherano sé lykilmaður fyrir liðið í baráttunni um fjórða sætið í ensku úrvalsdeildinni og þar með sæti í Meistaradeildinni á næsta tímabili.

Benitez lofaði fjórða sætinu fyrr á tímabilinu en Liverpool er í hörku baráttu við Manchester City, Aston Villa og Tottenham.

Benitez segir að Argentínumaðurinn sé nú kominn yfir það að vera orðaður við Barcelona síðasta sumar og að hann sé með fulla einbeitingu á því að spila vel fyrir Liverpool.

„Þetta var mjög erfitt fyrir hann í upphafi tímabilsins. Nú hefur þetta allt róast og hann er að vinna vel fyrir liðið," sagði Rafael Benitez.

„Hann er nú aftur orðinn að þeim Javier Mascherano sem við fengum til Liverpool. Hann er með hundrað prósent einbeitingu á það að spila vel fyrir félagið," sagði Benitez.