Framandi úrræði að vista þýska vandræðaunglinga á Íslandi

Forstöðumaður félags- og skólaþjónustu Snæfellinga segir það framandi úrræði og fjarrænt að senda þýska unglinga til vistunar á íslenskum sveitaheimilum eins og gert hefur verið undanfarin ár. Unglingarnir eru settir á heimili þar sem ekki er töluð þýska og ganga í skóla á meðan þeir eru vistaði hér.

Í fréttum okkar um helgina sögðum við frá starfsemi þýska fyrirtækisins Let´s Go hér á landi en það er með samning við Barnaverndarstofu sem heimilar fyrirtækinu að senda allt að 15 þýska vandræðaunglinga til vistunar á íslenskum sveitaheimilum.

Let´s Go er eins konar undirverktaki hjá þýskum sveitarfélögum og bíður upp á meðferðarúrræði fyrir þau börn sem er hvað verst stödd þar í landi. Unglingarnir sem hingað koma eru á aldrinum 14-18 ára en það eru þýsk sveitarfélög viðkomandi einstaklinga sem greiða fyrir meðferðina. Hún þykir afar dýr og eingöngu reynd eftir að önnur ráð þrjóta.

Unglingarnir sem hingað koma dvelja á íslenskum sveitaheimilum í allt frá sex mánuðum upp í tvö ár en fyrirtækið býður einnig upp á senda börn til Rúmeníu og Svíþjóðar.

Áhersla er lögð á þeir fósturforeldrar sem taka börnin í vist tali ekki þýsku og þá ganga börnin ekki skóla á meðan þau eru hér á landi en fá þess í stað reglulega heimakennslu. Þetta hefur vakið athygli þeirra sem starfa að barnaverndamálum hér á landi

Sveinn Þór Elínbergsson er forstöðumaður félags- og skólaþjónustu Snæfellinga, en nokkur af þessum þýsku börnum eru vistuð þar.

„Mér sýnist þessi úrræði vera okkur Íslendingum mjög framandi. Maður veltir fyrir sér hlutum eins og samskiptum við jafnaldra og tengls við víðtækara umhverfi en það sveitarfélag þar sem þau eru vistað,“ segir Sveinn sem telur að ekki væri hægt að bjóða Íslendingum upp á samskonar fyrirkomulag. „Á okkar mælikvarða þætti þetta ekki gott.“