RÚV tapar milljón á dag undir stjórn útvarpsstjóra

Ríkisútvarpið hefur tapað rúmri milljón á dag þann tíma sem Páll Magnússon hefur verið útvarpsstjóri, sem eru öllu meira en stofnunin tapaði á dag í útvarpsstjóratíð fyrirrennara hans. Frá árinu 2002 hefur launakostnaður Ríkisútvarpsins aukist töluvert umfram laun á almennum launamarkaði.

Hallarekstur hefur verið viðvarandi vandamál hjá Ríkisútvarpinu í mörg ár. Markús Örn Antonsson var útvarpsstjóri frá janúar 2001 til loka ágústmánaðar 2005. Á þessum fjórum árum og átta mánuðum var rekstrarfé Ríkisútvarpsins samtals 14,6 milljarðar króna. Halli var á rekstrinum öll árin var samtals einn milljarður og 19 milljónir króna sem er um 7 % af rekstrarfé stofnunarinnar.

Vonir manna um að reksturinn myndi batna við það að Ríkisútvarpið var hlutafélagavætt hafa ekki ræst. Um síðustu áramót hafði Páll Magnússon verið útvarpsstjóri í fjögur ár og fjóra mánuði. Á þessum tíma var rekstrarfé stofnunarinnar 17 milljarðar og 59 milljónir, en hallinn á rekstrinum hefur verið mikill á sama tímabili eða rúmlega 1,8 milljarðar króna.

Það er verri afkoma en í tíð Markúsar, því þetta er halli upp á um 10,6 prósent af rekstrarfé Ríkisútvarpsins á umræddu tímabili. Markús Örn stjórnaði RÚV í 1.700 daga og var hallinn þá að meðaltali um 645 þúsund krónur á dag. Um síðustu áramót hafði Páll Magnússon stjórnað Ríkisútvarpinu í 1.581 dag með halla upp á 1,1 milljón krónur á dag að meðaltali.

Fjöldi fastráðinna starfsmanna hjá Ríkisútvarpinu hefur lítið breyst á undanförnum árum. Árið 2002 voru fastráðnir starfsmenn 311 og launakostnaðurinn 1,2 milljarðar. Á árinu 2009 hafði fastráðnum starfsmönnum fækkað um fjóra og voru 307, en launakostnaðurinn var þá kominn í tvo milljarða og 39 milljónir.

Frá árinu 2002 hækkaði launakostnaðurinn því um 69,9 prósent en á sama tímabili hækkuðu laun á almennum vinnumarkaði um 63 prósent, eða um 7 prósentustigum minna en launin hjá RÚV. Útvarpsstjóri boðar aðgerðir til að vinna á hallanum, en ekki hefur verið upplýst í hverju þær muni felast.