Taylor orðin góðhjörtuð á nýjan leik

Leikkonan Elísabet Taylor sagði frá því á Twitter síðu sinni í dag að hjartaaðgerð sem hún gekkst undir í vikunni hafi heppnast fullkomlega.

-Þetta er eins og að vera með nýja pumpu, segir leikkonan.

Hún skýrði fyrst frá því á Twitter síðu sinni á þriðjudag að hún væri að leggjast inn á sjúkrahús, sem hún nafngreindi þó ekki.

Elísabet Taylor er 77 ára gömul og hefur oft átt við veikindi að stríða. Hún var í áratugi ein dáðasta og elskaðasta leikkona heims.

Í fyrstu myndum sínum var hún kannski fyrst og fremst vinsæl fyrir hvað hún var forkunarfögur.

Þegar árin færðust yfir hana sýndi hún hinsvegar að hún var einnig hörku leikkona.