Talibanar sækja í sig veðrið í Pakistan

Síðasta vikan hefur verið eitt blóðugasta tímabil í sögu Pakistan eftir stanslausar árásir talibana.

Yfir 100 eru látnir eftir árásirnar sem hafa margar hverjar beinst að herstöðvum víða um landið. Talibanar hafa sótt mjög í sig veðrið undanfarið og eru að því er virðist langt frá því að leggja árar í bát þrátt fyrir að hafa þurft að lúta í lægra haldi fyrir hermönnum í átökunum í Swat-dalnum í sumar.

Ekki er þó talið að uppreisnarmennirnir séu svo öflugir að þeim muni takast að ná stjórn á landinu öllu eða ákveðnum hlutum þess enda er pakistanski herinn sjá sjötti stærsti í heiminum og hefur fram að þessu veitt öfluga mótspyrnu. Ástandið er verulega slæmt að sögn ráðamanna og telja þeir víst að það geti varla versnað. Það sem þeir óttast hins vegar mest er að það muni haldast óbreytt um langt skeið sem er nógu skelfilegt fyrir íbúa Pakistan.

Í morgun bárust af því fréttir að sprengja hafi sprungið í borginni Peshawar í norðvesturhluta landsins. Sprengjan sprakk nærri herbúðum stjórnarhersins og samkvæmt fyrstu fregnum af sprengingunni hafa að minnsta kosti tíu látið lífið.