Vilja almannaheillanefndir líkt og á Akureyri

Borgarfulltrúar Samfylkingar og Vinstri græna vilja að verði á laggirnar almannaheillanefndir stofnana og frjálsra félagasamtaka í hverfum borgarinnar. Mælt verður fyrir tillögunni á fundi borgarstjórnar sem hefst klukkan 14. Fyrirmyndin er fengin frá Akureyri.

Í greinargerð með tillögunni segir að miðað við núverandi efnahagsástand, stóraukið atvinnuleysi og alvarlegs greiðsluvanda fólks þarf samstöðu allra í samfélaginu. Ljóst sé að efnahagskreppan komi mismunandi niður á fólki eftir stöðu þess, kyni, aldri og uppruna.

,,Því þarf að nýta sér kosti nærsamfélagsins og þróa þjónustu þeirra fjölmörgu sem huga að velferð samborgara sinna, þannig að ný viðfangsefni verði til þess að nýjar lausnir fæðist," segir í greinargerðinni.

Markmið með starfinu er að fylgjast vel með þróun mála hjá íbúum hverfisins og vera með samhæfðar viðbragðsáætlanir til að mæta þörfum þeirra. Fulltrúar þjónustumiðstöðva, heilsugæslu, skóla, trúfélaga, vinnumiðlunar, stéttarfélaga, íþróttafélaga og frjálsra félagasamtaka verði fengnir til að koma reglulega saman í þessu skyni.

Fyrirmyndin af almannaheillanefndum er fenginn frá Akureyrarbæ. Þar hefur verið komið á sérstakt Ráðgjafartorg vegna aðstæðna í efnahagslífi þjóðarinnar sem hefur það markmið að samræma og auðvelda aðgang að þjónustu og ráðgjöf á vegum Akureyrarbæjar og samstarfsaðila.