Amfetamín er enn framleitt hér á landi

Lögreglan hefur upplýsingar um að amfetamín sé framleitt hér á landi. Karl Steinar Valsson, yfirmaður fíkniefnadeildar lögreglunnar á höfuðborgarsvæðinu, staðfestir þetta.

„Við höfum upplýsingar um að amfetamín hafi verið framleitt á Íslandi og að það sé ennþá gert," segir Karl Steinar. „Það er bæði flutt inn og framleitt að einhverju leyti hér innan lands. Í nokkrum málum sem upp hafa komið hefur verið um að ræða smygl á amfetamíni í fljótandi formi, sem hefur þá átt að fullvinna hér. Hægt er að fullvinna þetta efni á ýmsum stigum framleiðslunnar."

Spurður hvort talið sé að amfetamín sé framleitt í miklu magni hérlendis kveðst hann ekki vilja tjá sig frekar um málið á þessu stigi.

Götuhópur fíkniefnadeildar lögreglunnar á höfuðborgarsvæðinu hefur tekið tæp 44 kíló af fíkniefnum í húsleitum það sem af er árinu. Á sama tíma í fyrra hafði hópurinn tekið rétt rúm níu kíló.

Karl Steinar bendir á að fyrir utan það magn sem hér er um að ræða séu fjölmörg innflutningsmál, þar sem stórar fíkniefnasendingar hafi verið teknar. Þessar tölur segi því aðeins hluta sögunnar, en beri engu að síður vott um frábæran árangur.

„Á þessum tíma í fyrra vorum við að hefja undirbúning þess að taka þessar kannabisræktanir. Við vorum þá með ábendingar um að mikil sveifla væri að ganga yfir í innlendri framleiðslu á kannabisefnum. Við tókum þá ákvörðun að einbeita okkur að þessum málum og það hefur sýnt sig að sú ákvörðun var hárrétt. Við höfum verið að taka meira en eina ræktun á viku að meðaltali. Það eru ekki mörg ár síðan sama magn og við erum að taka á viku núna var tekið á heilu ári. Munurinn er því yfirgengilega mikill."

Karl Steinar segir þessa aukningu stafa af því að auk þess sem fíkniefnadeildin hafi einbeitt sér að kannabisræktunum virðist uppsveifla hafa verið í framleiðslu fíkniefna og sölu þeirra í kjölfarið. Framboð af kókaíni hafi verið heldur minna en oft áður. Amfetamín hafi hins vegar verið algengasta sterka efnið hér á landi í mörg ár.jss@frettabladid.is