Fundu fíkniefni á ökumanni

Lögreglan stöðvaði ökumann á Vesturlandsvegi við Hvalfjarðargöng um miðnætti í nótt vegna gruns um að hann væri undir áhrifum fíkniefna. Við nánari eftirgrennslan lögreglu fundust fíkniefni á manninum. Hann var handtekinn en látinn laus aftur að lokinni skýrslutöku. Þá var bílvelta á Snæfellsvegi við Hítará um fimmleytið í gær. Ökumaður missti stjórn á bíl sínum í mikilli hálku með þeim afleiðingum að hann valt. Þrennt var í bílnum. Þau sakaði ekki en það kviknaði í bílnum við veltuna og brann hann til kaldra kola að sögn lögreglu.