Sakar Framsókn um pólitíska spillingu í útboði

Framkvæmdastjóri verktakafyrirtækisins Fonsi sakar framsóknarmenn um pólitíska spillingu og sóðaskap í tengslum við útboð á framkvæmdum í miðbæ Reykjavíkur. Hann útilokar ekki að málið verði kært.

Málið snýst um uppbyggingu á brunareitnum svokallaða á horni Lækjargötu og Austurstrætis. Verkið var boðið út í síðasta mánuði og átti verktakafyrirtækið Fonsi lægsta tilboðið. Eykt sem átti næst lægsta tilboðið fékk hins vegar verkið.

Tilboð Fonsa hljóðaði upp á tæpar 138 milljónir en Eykt bauð hins vegar rúmar 143 milljónir króna í verkið.

Tilboði Fonsa var hafnað þar sem fyrirtækið þótti ekki hafa uppfyllt öll skilyrði útboðsins.

Samkvæmt ársreikningi félagsins fyrir árið 2008 var eiginfjárstaða ekki yfir skilyrtu lágmarki útboðsins. Félagið er hins vegar yfir lágmarkinu samkvæmt árshlutareikningi fyrir núgildandi ár.

Þá er einnig um það deilt hvort félagið hafi reynslu af jafn stórum framkvæmdum og hér um ræðir.

Framkvæmdastjóri Fonsa segir augljóst að útboðið hafi verið fyrirfram ákveðið og ljóst að Eykt átti að fá verkefnið. Vísar hann meðal annars til þess að Eykt hafi borgað í kosningasjóð framsóknarmanna á sínum tíma.

„Ég tel að þetta sé pólitík spilling sóðaskapur sem við viljum ekki sjá," segir Sigurfinnur Sigurjónsson, framkvæmdarstjóri Fonsa en spurður hvað hann eigi nákvæmlega við svarar hann:

„Við vitum öll sem fylgjum með fréttum tengslin á milli framsóknarmanna í Reykjavík og umrædds fyrirtækis og ég held að það sé enn einu sinni að koma í ljós að þeir eru að uppskera fyrir styrk til Framsóknarflokksins."

Hallur Magnússon, formaður innkauparáðs Reykjavíkurborgar og fulltrúi framsóknarmanna í ráðinu, sagði í samtali við fréttastofu í dag að ekki hafi verið hægt að fallast á tilboð Fonsa þar sem félagið hafi ekki uppfyllt öll skilyrði. Ekki hafi verið hægt að taka árshlutareikning félagsins gildan þar sem hann hefur ekki skattalegt gildi. Hallur vísar ennfremur ásökunum um spillingu á bug.

Sigurfinnur hefur nú sett í samband við lögfræðing Samtaka iðnaðarins og íhugar nú að kæra málið.