Veitt strax þegar laun lækka

Velferðarráð Reykjavíkurborgar hefur ákveðið breytingar á reglum um fjárhagsaðstoð. Breytingin felur í sér að nú eiga um 200 fjölskyldur með um 300 börn á framfæri rétt á sérstakri fjárhagsaðstoð. Þessi fjárhagsaðstoð er viðbót við þá aðstoð sem Reykjavíkurborg hefur veitt barnafjölskyldum fyrr á árinu.

Markmiðið með breytingunum er að koma betur til móts við tekjulága foreldra með börn á framfæri. Fram til þessa hefur verið heimilt að veita sérstaka fjárhagsaðstoð vegna barna, krónur 11.635 á mánuði, ef tekjur undanfarna fjóra mánuði hafa verið við eða lægri en grunnfjárhæð fjárhagsaðstoðar. Eftir breytingu er hægt að veita sérstaka fjárhagsaðstoð vegna barna strax og tekjur lækka niður fyrir grunnfjárhæð.

Að sögn Jórunnar Frímannsdóttur, formanns Velferðarráðs, eru reglurnar um fjárhagsaðstoð í endurskoðun.

„Það var nauðsynlegt, í ljósi breyttra aðstæðna, að gera breytingu hvað þennan lið varðar strax. Fólk hefur minni bjargráð en áður, stórfjölskyldan á erfiðara með að hlaupa undir bagga og það er mikilvægt að styðja við börnin.“

Kostnaður borgarinnar vegna breytingarinnar er um þrjár milljónir á tímabilinu september til desember 2009, en áætlaður kostnaður á ársgrundvelli 4,8 milljónir króna. - shá