Íþróttir fyrir alla á Akureyri

Átakið Íþróttir fyrir alla fer vel af stað á Akureyri. Verkefnisstjóri átaksins, kunnur handboltakappi, passar börn svo mæður og feður geti stundað jóga áhyggjulaus.

Ókeypis heilsurækt fyrir alla er yfirskrift verkefnis sem hófst á Akureyri í vikunni. Þar er lögð áhersla á að nýta þá aðstöðu sem fyrir er í íþróttamannvirkjum og útivist á Akureyri. Sjávarútvegsfyrirtækið Samherji er aðalbakhjarl verkefnisis og gefst öllum, bæði konum og körlum kostur á að koma, láta jafnvel passa börnin og fá fría ferð á áfangastað.

Jónatan Magnússon handboltakappi fer fyrir verkefninu og þarf hann að gegna ýmsum skyldum. Á meðan um 30 konur á Akureyri nýttu sér tilboð um ókeypis jóga yfir miðjan dag í dag sinnti hann því fróma verki, barnapössun, svo mæðurnar gætu stundað jógað, alveg áhyggjulausar. Konurnar höfnuðu því hins vegar af akureyrskri hlédrægni að þær yrðu myndaðar við iðju sína.

Verkefnið stendur í sex mánuði. Kostnaður er áætlaður um 6 milljónir, þar af leggur Samherji fram helming. Forráðamenn verkefnisins segja líklegt að atvinnuleysi aukist töluvert frá því sem nú er, félagslegum vandamálum fjölgi og fátækt vaxi. Það sé mikilvægt að allir eigi kost á félagslegum samskiptum og hreyfingu, án tillits til efnahags. Meðal þess sem boðið verður upp á eru stafgöngur í Kjarnaskógi, jóga, leikfimi, dans og gönguskíði. Og allt frítt.