Deild fyrir einhverf börn stofnuð í haust

 Stofnuð verður sérdeild fyrir einhverf börn í einum af grunnskólum Hjallastefnunnar á hausti komanda. Deildin er hugsuð sem vísir að umfangsmeiri úrræðum fyrir börn með þroskaraskanir á vegum Hjallastefnuskólanna.

Margrét Pála Ólafsdóttir, framkvæmdastjóri Hjallastefnunnar, segir að til þessa hafi ríkt sú trú að blöndun, eða samskipan barna með ólíkar þarfir, sé eina rétta leiðin. „Við erum að andæfa þeirri hugmynd. Við teljum að sérstakar deildir sem taki einvörðungu á stöðu einhverfra barna og geri þeim kleift að fara inn í samstarf með öðrum nemendum séu það sem koma skal.“

Að mati Margrétar Pálu tekur skólakerfið ekki nægilegt tillit til þarfa þessa hóps barna, þrátt fyrir að kennarar hafi svo sannarlega reynt sitt besta.

Margrét Pála segir að á undanförnum árum hafi greiningum á einhverfurófi og dæmigerðri einhverfu fjölgað svo undrum sæti. „Kerfið hefur hins vegar ekki haft við. Við einkaaðilarnir getum hins vegar oft hlaupið hraðar en stóru kerfin.“

Hin nýja deild verður stofnuð við einhvern þriggja grunnskóla Hjallastefnunnar. Í upphafi verður deildin fyrir sjö til tíu börn og hvert þeirra fær sinn eigin kennara. Margrét Pála segir að fjölmörg einhverf börn hafi verið í leikskólum Hjallastefnunnar og þess vegna sé mikil uppsöfnuð þekking hjá starfsfólki sem mun nýtast til fullnustu. Nú er hafin leit að stuðningsaðilum, bæði faglegum og fjárhagslegum.

„Við trúum því staðfastlega að fjölmargir vilji leggja okkur lið og ég auglýsi hér með eftir því. Það er líka von mín að við verðum ekki ein um þetta heldur muni fleiri bjóða upp á sértæk úrræði fyrir þá sem þurfa sértækan stuðning á tilteknu æviskeiði.“

Margrét Pála segir sérdeild sem þessa útheimta mikið fjármagn. Leitað hefur verið til eins sveitarfélags um stuðning en fleirum verið kynnt hugmyndin.

Sigrún Birgisdóttir, framkvæmdastjóri Umsjónarfélags einhverfra, segir að stofnun sérdeildar innan Hjallastefnunnar sé frábær frétt og verði góð viðbót við þær sérdeildir fyrir einhverfa sem fyrir starfa í grunnskólum á höfuðborgarsvæðinu. Innan hvers árgangs sé talið að einn af hverjum 150 einstaklingum sé með fötlun á einhverfurófinu. „Þörfin fyrir nýja sérdeild eins og þessa er vissulega mikil,“ segir Sigrún.

svavar@frettabladid.is