Augu Hollywood til Íslands

Sex af fremstu tökustjórum Hollywood eru væntanlegir til landsins í dag og hyggjast skoða náttúru Íslands í fylgd íslenskra framleiðslufyrirtækja. Tökustjórar (e. location managers) eru hálfgerð augu Hollywood en þeirra hlutverk er að finna heppilegustu tökustaðina fyrir stórmyndir frá kvikmyndaborginni.

Hvorki nöfnin né andlitin á þessum aðilum sem hafa boðað komu sína hingað eru heimsfræg. Þetta eru engu að síður mennirnir sem ráða ansi miklu um hvar kvikmyndir eru teknar og vinna mikilvæg störf á bakvið tjöldin. Má þar meðal annars nefna Kokayi Ampah sem hefur verið Clint Eastwood innan handar að undanförnu og rakst meðal annars á svartar strendur Sandvíkur fyrir Flags of Our Fathers. William Bowling kemur einnig til landsins en hann sá um að finna tökustaði fyrir kvikmyndir á borð við Saving Private Ryan, The Horse Whisperer og The Fisher King. Þá má einnig nefna Michael J. Burmeister en hann á heiðurinn af tökustöðunum í Terminator Salvation, Transformers og National Treasure. Sem sagt þungavigtarmenn í því starfi sem gæti reynst Íslandi happadrjúgt á komandi árum.

Einar Tómasson hjá Film in Iceland segir þetta vera eitt umfangsmesta markaðssetningarverkefni sem fyrirtækið hafi ráðist í. „Ég veit ekki til þess að þetta hafi verið gert áður," útskýrir Einar og telur að þarna liggi mikil sóknarfæri fyrir íslensku fyrirtækin sem starfi innan þessa geira. Á meðan á dvöl hinna erlendu gesta stendur munu þeir ferðast um nágrenni höfuðborgarsvæðisins og svo halda til Hornafjarðar, en svæðið þar um kring hefur verið ansi vinsælt meðal kvikmyndagerðarmanna utan úr heimi. Einar kveðst ákaflega spenntur yfir því hvernig þessi samkunda gangi. „Menn verða að hafa það í huga að þessir náungar eru alltaf að störfum, eru alltaf að leita að heppilegum tökustöðum."freyrgigja@frettabladid.is