Ólafur Ragnar á alþjóðlegri vísindaráðstefnu

Í fyrramálið verður sett hér á landi alþjóðleg vísindaráðstefna um bindingu koltvísýrings í jarðlögum. Ráðstefnan fer fram á heimavelli fjölþjóðlega CarbFix verkefnisins, í Hellisheiðarvirkjun, og á meðal fyrirlesara eru nokkrir fremstu loftslagssérfræðinga heims.

Þetta kemur fram í tilkynningu frá Orkuveitu Reykjavíkur nú í kvöld. Þar segir ennfremur að ráðstefnan hefjist með ávörpum þeirra Hjörleifs Kvaran forstjóra OR og Ólafs Ragnars Grímssonar, forseta Íslands. Þá flytja m.a. erindi Wally Broecker og Klaus Lackner frá Columbia háskóla og Tore Torp frá Statoil, en Norðmenn hafa dælt koltvísýringi niður í gas- og olíulindir sínar um árabil. Ráðstefnuna sækja vísindamenn og stefnumótunaraðilar frá flestum heimsálfum. Henni lýkur síðdegis á þriðjudag.

Loftslagsmálin eru mjög í deiglu þessa daga, eftir því sem nær líður Kaupmannahafnarráðstefnunni. Hún verður haldin í desember og þar munu þjóðir heims ákveða hvernig þær hyggist takast á við ógnina sem stafar af hlýnun jarðar.