Ræktar tóbak og grasker

Í Skorradal hafa nokkrir starfsmenn Skógræktar ríkisins tekið sig til og gera nú tilraunir með að rækta grasker, tóbak og maís hér á landi.

Orri Freyr Finnbogason og samstarfsmenn hans hjá Skógrækt ríkisins stunda ýmis konar tilraunastarfsemi þegar kemur að nytja- og matjurtarækt.

Auk þess að rækta hefðbundið grænmeti, líkt og kartöflur og gulrætur, hafa þeir meðal annars gert tilraunir til að rækta tóbak, baunir og maís.

„Ég hef verið mikið á Spáni og komst þar í kynni við fólk sem hefur eiginlega sagt sig úr samfélaginu og stundar sjálfsþurftarbúskap í Píreneafjöllunum. Þau voru með sérstakan sáðbanka sem ég fékk aðgang að og ég tók eitthvað af fræjum með mér heim. Mér finnst veður- og gróðurfar þarna í Píreneafjöllunum ekki svo ólíkt því sem gerist hér á Íslandi þannig ég held að það sé ekki spurning að eitthvað af þessum fræjum eigi eftir að vaxa og dafna hér,“ segir Orri Freyr en hann telur að Íslendingar gætu með tíð og tíma orðið næstum sjálfbær þjóð.

„Mér þykir samfélagið komið á undarlega braut þegar fólk þarf að vinna átta tíma á dag bara til þess að eiga fyrir mat og húsaskjóli. Þarna er fólk að horfa til aukinna lífsgæða í formi frítíma sem það getur eytt með fjölskyldu og vinum eða til að sinna áhugamálum. Mér fannst þetta mjög heillandi allt,“ segir Orri.

Á ferðum sínum um Spán kynntist Orri Freyr ýmsum kynlegum kvistum og bjó meðal annars hjá áttræðum, heyrnalausum manni sem kenndi honum þá hættulegu iðju að veiða villisvín.

„Hann kenndi mér meðal annars að búa til villisvínagildrur og hvernig hægt væri að finna þau með því að skoða börkinn á trjánum og rýna í sporin sem þau skilja eftir sig. Villisvín eru mjög hættuleg dýr og maður þarf því að passa sig mjög vel við veiðarnar, en kjötið af þeim er algjört lostæti.“

Aðspurður segir Orri að honum hafi ekki þótt erfitt að aðlaga sig að breyttum lifnaðarháttum en að honum hafi þótt erfiðast að vera án rennandi vatns. „Ég saknaði heita vatnsins og stundum gat orðið ansi kalt, en þetta venst eins og allt annað,“ segir Orri að lokum. sara@frettabladid.is