Jóhanna skrifaði starfsbræðrum bréf vegna Icesave

Jóhanna Sigurðardóttir forsætisráðherra sendi starfsbræðrum sínum í Bretlandi og Hollandi bréf í síðustu viku vegna samþykktar Alþingis á lögum um ríkisábyrgð í tengslum við Icesave samningana. Óskaði Jóhanna atbeina þeirra til að ná fram farsælli lausn að því er varðar Icesave málið og fjallaði um hugsanlega fundi forsætisráðherranna.

Í fréttatilkynningu frá forsætisráðuneytinu kemur fram að embættismenn frá Íslandi, Hollandi og Bretlandi hittust á óformlegum fundi í Haag í Hollandi. Tilgangur fundarins var að upplýsa og skiptast á skoðunum um nýsamþykkt lög á Alþingi um ríkisábyrgð á láni Breta og Hollendinga til Tryggingarsjóðs til þess að greiða lágmarkstryggingu til innstæðueigenda Icesave reikninga. Af hálfu Íslendinga sátu fundinn embættismenn í forsætis-, fjármála- og utanríkisráðuneytum, auk Seðlabanka Íslands. Íslensku fulltrúarnir skýrðu á fundinum út einstök atriði í meðferð málsins og frumvarpið sjálft.

Í tilkynningu frá forsætisráðuneytinu kemur fram að góður andi hafi ríkt á fundinum og taka fulltrúar landanna væntanlega upp þráðinn í næstu viku, í þeim tilgangi að ná fram sameiginlegum skilningi eins fljótt og auðið er. Í hádeginu í dag funduðu fulltrúar forsætis-, fjármála- og utanríkisráðuneytis síðan með fjárlaganefnd Alþingis og upplýstu um framangreind atriði.