Þeir sem fóru mjög geyst í góðærinu fái líka aðstoð

Talsmenn ríkisstjórnarinnar hafa talað fyrir sértækum aðgerðum frekar en almennri niðurfellingu skulda heimilanna. Viðskiptaráðherra var spurður hvort ekki mætti óttast reiði meðal almennings þegar afskrifað yrði hjá einum en ekki hinum. Hann segir ekki hægt að finna reglu sem öllum líki við.

„En það ætti að vera hægt að finna viðmið sem eru eðlileg og viðunandi fyrir flesta. Það verður auðvitað þannig að einhverjir fá afskrifað sem fólki finnst kannski óverðskuldað, einhverjir sem fóru mjög geyst í uppsveiflunni. Það verður bara að hafa það; ef menn geta ekki greitt er ekki hægt að gera neitt annað en að afskrifa eitthvað af því.“

Ráðherra segir að eflaust finnist einhverjum ósanngjarnt að slíkt fólk fái aðstoð.

„En það er ekki hægt að stinga höfðinu í sandinn með það að sumir, því miður allt of margir, skulda meira en nokkur von er til að þeir endurgreiði.“

Hann minnir þó á að tveir þriðju heimila ráði við sínar skuldir.

Hann endurtekur orð félagsmálaráðherra hér í blaðinu um að horft verði bæði til veðsetningar og greiðslugetu. Gylfi vill þó ekki slá neinu fram um hvernig fyrirkomulagið verði nákvæmlega.

Hins vegar geti, burtséð frá þessu, verið eðlilegt að bankarnir taki sérstaklega á erlendum lánum.

„Þeim fylgir gengisáhætta fyrir bankann ekki síður en lánveitandann. Það getur verið akkur í því fyrir bæði lánveitanda og skuldara að þeim sé breytt í íslenskar krónur,“ segir Gylfi.

Af húsnæðislánum almennt verði „ábyggilega verulegar afskriftir“.

klemens@frettabladid.is