Helmingur fyrirtækja ætlar að halda óbreyttum starfsmannafjölda

Ríflega helmingur aðildarfyrirtækja Samtaka atvinnulífsins hyggst halda óbreyttum starfsmannafjölda á næstu mánuðum. Þetta kemur fram í nýrri könnun Samtaka atvinnulífsins á atvinnuhorfum meðal fyrirtækjanna.

Fram kemur í athugasemdum svarenda að þrek margra fyrirtækja dvínar ört. Í könnuninni kemur skýrt fram að stjórnendur fyrirtækja telja að lækka verði vexti fljótt svo fyrirtækin í landinu geti starfað áfram og koma verði bankaþjónustu í eðlilegt horf á nýjan leik ásamt því að gjaldeyrishöft verði afnumin.

Tæplega sex af hverjum tíu aðildarfyrirtækjum SA fækkuðu ekki starfsmönnum á síðasta ári þrátt fyrir versnandi rekstrarhorfur. Tæp 18% fyrirtækjanna brugðu á það ráð að breyta fullum störfum í hlutastörf til þess að forðast uppsagnir og um 18% gripu til launalækkana til að tryggja áframhaldandi rekstur.