Konur bannaðar á mótorhjólum

Mótorhjól og skellinöðrur eru þægilegur ferðamáti á þéttbýlli Gaza ströndinni. Góðar til að skjótast á milli bíla og hestvagna.

Sjaldgæft er að konur keyri þar vélfáka, en þær sitja gjarnan aftaná, hjá mönnum sínum ef hjónin þurfa að bregða sér bæjarleið.

Það hefur nú verið bannað. Íbúunum sýnist sitt hvað. Sumir segja að ef þetta sé það sem Hamas stjórnin vilji, þá séu þeir alveg sáttir við það.

Öðrum þykir vegið að persónufrelsi sínu. Hamas samtökin segja að bannið hafi verið sett til þess að gæta öryggis borgaranna og tryggja venjur og hefðir hins palestinska samfélags.

Stíað í sundur

Fréttaskýrendur eru hugsi. Þeir líta til þess að undanafarið hafa ýmsar nýjar reglur verið settar sem beint er að konum.

Til dæmis er farið að stíja í sundur körlum og konum sem sitja saman á baðströndum. Og kven-lögfræðingum hefur verið skipað að vera með slæður í réttarsölum.