Óvíst með kosningar í Afganistan

Óljóst er á þessari stundu hvort fyrirhugaðar forsetakosningar sem halda átti í Afganistan næsta laugardag verði haldnar. Um aðra umferð var að ræða þar sem talið var að stuðningsmenn sitjandi forseta, Hamids Karzai hefðu beitt brögðum í fyrri umferðinni þegar hann fékk meirihluta atkvæða. Því var ákveðið að kjósa upp á nýtt á milli Karzais og helsta keppinautar hans Abdullah Abdullah.

Sá dró sig hins vegar í hlé í gær og sagði ekki nægilega vel að verki staðið við að koma í veg fyrir svindl í seinni umferðinni. Bandaríkjamenn og Bretar, sem áður studdu það að kosið yrði á ný, eru nú sagðir á móti hugmyndinni þar sem þeir óttast að Talíbanar geri mannskæðar árásir á kjörstaði.

Hillary Clinton, utanríkisráðherra Bandaríkjanna segist virða ákvörðun Abdullah.