Biðlaun fara yfir sex milljónir

Sigurður Magnús­son, sem hætti sem bæjarstjóri á Álftanesi í september, á að fá átta mánaða biðlaun samkvæmt ráðningar­samningi frá 2006.

„Samkvæmt ráðningarsamningi Sigurðar á hann að fá greidd tveggja mánaða biðlaun fyrir hvert byrjað ár sem bæjarstjóri,“ útskýrir Kristinn Guðlaugsson, forseti bæjarstjórnar Álftaness.

Starfslok Sigurðar hafa verið til umræðu í bæjarráði og bæjarstjórn að undanförnu án þess að málið hafi verið afgreitt. Núverandi meirihluti telur nóg að Sigurður fái sex mánaða biðlaun. Vegna breytinga á ráðningarsamningnum frá í vor hefði það orðið niðurstaðan ef Sigurður hefði klárað kjörtímabilið í bæjarstjórastólnum. Sjálfur leggur Sigurður fram lögfræðiálit um að hann eigi að fá átta mánaða biðlaun.

Ekki liggja fyrir upplýsingar um hverjar greiðslurnar til Sigurðar eiga nákvæmlega að vera. Samkvæmt ráðningarsamningi frá 2006 og þróun launavísitölu síðan ættu föst mánaðarlaun hans sem bæjarstjóri að vera um 800 þúsund krónur. Átta mánaða greiðsla myndi þannig nema um 6,4 milljónum. Þar fyrir utan hefur Sigurður fengið ýmsar aðrar greiðslur, til dæmis lífeyrisgreiðslur og fyrir akstur og síma- og tölvukostnað.

Auk biðlaunanna fær Sigurður um 95 þúsund á mánuði fyrir að vera í bæjarráði og bæjarstjórn og 25 þúsund að auki fyrir hvern fund sem hann sækir þar. - gar