Með gamalt rokk í mjöðm

Rokkabillísveitin Langi Seli og Skuggarnir snýr aftur eftir sautján ára hlé. Fimmtugsafmælið kveikti á gömlu rokkvélinni.

Platan ber heitið Drullukalt og inniheldur tíu ný lög eftir Langa Sela og Jón Skugga. Síðasta plata sveitarinnar kom út í byrjun tíunda áratugarins, eða fyrir um sautján árum, og því löngu kominn tími á endurkomu Langa Sela og félaga. „Ég hætti að starfa í tónlist og fór að vinna sem leikmyndahönnuður,“ segir Seli um hið langa hlé. „Síðan var ég plataður í að spila í fimmtugsafmæli hjá vinkonu minni og þá tók sig upp gamalt rokk í annarri mjöðminni og þetta er niðurstaðan.“

Drullukalt ber í raun ekki nafn með rentu því hún er ekta sumarplata sem ætti að koma fólki í gott skap í sólinni. „Það er mjög skemmtilegt að hafa hana í bílnum,“ viðurkennir Seli. „Þegar maður „krúsar“ upp Ártúnsbrekkuna byrjar hún að „kikka“ inn.“

Auk Sela og Jóns Skugga, sem eru upprunalegir meðlimir sveitarinnar, hafa bæst í hópinn þeir Erik Qvick og Gísli Galdur. „Fyrir mig er þetta heiður að hafa þessa þrjá gaura í bandinu. Ég þarf ekkert að hafa fyrir þessu,“ segir Seli.

Til að fagna plötunni verða útgáfutónleikar haldnir á Café Rósenberg í kvöld og hefjast þeir klukkan 22. Þeir félagar ætla að vera duglegir við spilamennsku í sumar og útiloka ekki að spila á Norðurlöndunum, enda mikil vakning orðið þar í rokkabillítónlist. „Við ætlum að láta reka á reiðanum og sjá hvað gerist. Við erum að spila eins mikið og við getum því okkur finnst gaman af því.“

- fb