Hrafn Gunnlaugsson uppgötvaði Lisbeth Sandler

Aðdáendur Stiegs Larsson geta andað léttar. Tekist hafa samningar milli dreifingarfyrirtækisins Senu og Nordisk film um að kvikmyndin Karlar sem hata konur verði sýnd hér á landi. Eins og Fréttablaðið hefur greint frá voru ansi mörg ljón í veginum þegar reynt var að fá myndina hingað til lands en nú hefur tekist að ryðja þeim öllum úr veginum. Bók Larssons hefur notið næstum fáránlegra vinsælda, Hún er uppseld í innbundinni útgáfu og kiljan rýkur út eins og heitar lummur. Tvær aðrar myndir verða gerðar eftir bókum Larssons og þær verða báðar sýndar hér á landi samkvæmt samningnum. Önnur myndin verður frumsýnd í lok þessa árs en síðasta myndin í þríleiknum verður sýnd eftir áramót. Myndin hefur slegið öll aðsóknarmet á hinum Norðurlöndunum og nánast haldið uppi miðasölunni í bíóhúsunum þar.

Karlar sem hata konur verður frumsýnd 22.júlí næstkomandi og verður aðalleikkona myndarinnar, hin finnska Noomi Rapace, væntanlega viðstödd frumsýninguna. Vonir standa til að fleiri leikarar verði hér viðstaddir. Noomi leikur húðflúraða tölvunjörðinn Lisbeth Sandler en það er hinn þrautreyndi Michael Nyquist sem bregður sér í líki Mikaels Blomkvist.

Noomi ætti ekki eiga í vandræðum með að krafsa sig fram úr viðtölum við íslenska fjölmiðlamenn. Hún á íslenskan stjúpföður og býr yfir ágætis íslenskukunnáttu. Noomi bjó á Flúðum ásamt móður sinni frá fimm ára aldri þar til hún varð átta ára en þá flutti fjölskyldan til Svíþjóðar. Í viðtali við dagblaðið Sydsvenska í lok janúar sagði Noomi meðal annars að þrátt fyrir velgengni sína á hvíta tjaldinu væri hugurinn nú hjá Íslendingum vegna efnahagskrísunnar. „Ég er alveg viss um að við eigum eftir að sjá forvitnilega list koma þaðan á næstu árum, bæði í kvikmyndum, bókmenntum og tónlist,“ sagði Noomi.

Og svo skemmtilega vill til að Hrafn Gunnlaugsson var sá leikstjóri sem fyrstur uppgötvaði hæfileika leikkonunnar því hún lék lítið hlutverk í myndinni Skugga hrafnsins, sjálfstæðu framhaldi af Hrafninn flýgur, sem gerð var 1988. Hrafn var að vonum ánægður þegar Fréttablaðið hermdi þetta upp á hann. „Ég man nú óljóst eftir henni, held að hún hafi búið í Svíþjóð á þessum tíma. En þetta var stelpa sem hafði einhver áhrif, hafði eitthvað við sig, þetta eðli, og það gleður mann alltaf að sjá fólk sem hefur tekið þátt í myndunum manns og verður síðan eitthvað annað og meira,“ segir Hrafn.

freyrgigja@frettabladid.is