Sterkari króna lækkar Icesave-skuldbindingar

Ef gengi íslensku krónunnar styrkist um eitt prósent myndi það lækka skuldbindingar Íslendinga vegna Icesave um rúma sex milljarða. Steingrímur J. Sigfússon fjármálaráðherra segir að öll gögn varðandi Icesave samningana verði gerð opinber.

Fjármálaráðherra flytur Alþingi á morgun skýrslu um Icesave samkomulagið. Jóhanna Sigurðardóttir forsætisráðherra segir það varfærnislegt mat að eignir Landsbankans dugi fyrir 75 prósentum af skuldbindingunum vegna Icesave. Þær gætu staðið undir meiru. Þá sé mikilvægt að lánstíminn sé langur og þannig verði meiri líkur á að verðmæti eignanna aukist. Með hverju prósentustigi sem gengið styrkist lækki skuldbinding Íslendinga um 6,5 milljarða.

Jóhanna segir að ef samið hefði verið á þeim nótum sem lágu fyrir í samningsdrögum fyrir áramót, hefði þurft að greiða 40 milljarða króna í vexti strax á þessu ári, sem hefði verið mjög erfitt fyrir ríkissjóð að reiða fram í gjaldeyriskreppunni. Fjármálaráðherra vísaði því á bug að pukrast hefði verið með þetta mál og það yrði að lokum Alþingi sem þyrfti að samþiggja ríkisábyrgð vegna samkomulagsins.

Það er ljóst að mörgum þingmönnum Vinstri grænna á eftir að reynast erfitt að greiða atkvæði með samkomulaginu á Alþingi. Atli Gíslason þingmaður Vinstri grænna er í leyfi frá þingstörfum og hefur ekki séð samkomulagið í smáatriðum. Hann sagði í samtali við fréttastofu í dag að hann hefði fyrirvara um stuðning við ríkisábyrgð vegna málsins og væri enn þeirrar skoðunar að þarna væri um ólögmæta nauðungarsamninga að ræða. Réttast hefði verið að fara dómstólaleiðina með málið.

Steingrímur segist ekki geta lofað stuðningi allra þingmanna Vinstri grænna fyrir þeirra hönd. Það sé rétt að málið sé óvinsælt og erfitt. „Það er enginn ánægður með það að Ísland þurfi að sitja upp með þessar skuldbindingar," segir Steingrímur. Hann treysti því að það verði nægjanlegur þingmeirihluti fyrir þeim afmarkaða þætti málsins að veita ríkisábyrgðina.

Forsætisráðherra segist reikna með að allir þingmenn Samfylkingarinnar styðji málið og jafnvel einhverjir þingmenn stjórnarandstöðunnar. Alþingi hafi samþykkt ályktun um að fela ríkisstjórninni að fara í þessa samninga. Það hafi ekki verið margir kostir í stöðunni.