Segir af sér stjórnarmennsku vegna rannsóknar sérstaks saksóknara

Jón Kr. Sólnes, stjórnarmaður í Byr, hefur ákveðið að láta af stjórnarstörfum á meðan á rannsókn málsins stendur og kalla inn varamann í sinn stað.

Ástæðan er sú að við rannsókn á málefnum Exeter Holdings hefur hann, sem stjórnarmaður í Byr gefið skýrslu hjá Sérstökum saksóknara. „Þrátt fyrir að ég telji mig hafa hreinan skjöld í þessu máli, hef ég, eins og aðrir sem tóku þátt í afgreiðslu málsins, fengið réttarstöðu grunaðs. Af þeim sökum hef ég óskað eftir að láta af stjórnarstörfum á meðan á rannsókn málsins stendur og kalla inn varamann í minn stað," segir Jón Sólnes í yfirlýsingu vegna málsins.

Hann segir tildrög stöðunnar sem hann er kominn í vera þá að 19. desember í fyrra var hann kallaður inn á stjórnarfund í Byr sparisjóði sem varamaður. Á fundinum voru meðal annars til umfjöllunar málefni Exeter Holdings (Tæknisetur Arkea) þar sem samþykkt var að framlengja yfirdráttarláni félagsins, sem sagt var í eigu MP fjárfestingarbanka og lánamörk hækkuð til þess að mæta vaxtagreiðslum. Í umræðum hafi komið skýrt fram að ekki væri ætlunin að nýta þennan reikning í bráð en atburðarás næstu vikna leiddi í ljós að við það var ekki staðið.

„Að mínu áliti er algjörlega nauðsynlegt að fullkomið traust ríki í garð allra þeirra sem koma að endurreisn Byrs sparisjóðs. Þess vegna vil ég víkja til hliðar á meðan ég hef umrædda réttarstöðu. Ég vil nota tækifærið og þakka samstarfsfólki fyrir þann áfanga sem náðst hefur í endurreisn sparisjóðsins. Sjálfur mun ég, hér eftir sem hingað til, leggja mitt af mörkum til þess að ljúka megi þeirri vinnu," segir Jón.