Á annað hundrað féllu og særðust í sprengjuárás í Pakistan

Yfir fjörutíu manns fórust og meira en eitthundrað særðust í sprengjuárás á markaðstorg í borginni Peshawar í Pakistan í dag. Sprengjan var í bíl sem ekið var inn á torgið.

Hún sprakk rétt þegar bíllinn ók framhjá strætisvagni. Hún var svo öflug að strætisvagninn tókst á loft og lenti á hliðinni, í björtu báli. Fólksbílar þeyttust einnig langar leiðir.

Mörgum þeirra sem særðust er ekki hugað líf.

Enginn hefur enn lýst ábyrgð á þessu ódæðisverki á hendur sér en yfirvöld eru í litlum vafa um að þarna hafi verið að verki talibanar sem tengjast al-Kaida.

Stjórnvöld hafa herjað mjög á talibana í Swat dalnum undanfarna mánuði og þeir eiga þar orðið í vök að verjast.

Á fundi með fréttamönnum í vikunni hótaði nýr leiðtogi talibana hefndum. Þeir hafa þegar valdið miklu manntjóni með sprengjuárásum á borgir og bæi í Pakistan á síðustu misserum.