Vikið af vegi sáttar við lagabreytingar

Nýmæli er, í síðari tíma stjórnmálasögu, að ríkisstjórn beiti sér fyrir breytingum á stjórnarskrá og lögum um Seðlabankann og kosningar án þess að um þær ríki samstaða allra flokka.

Seðlabankalögunum var breytt í síðustu viku og fyrir dyrum stendur að breyta bæði stjórnarskrá og kosningalögum.

Síðast voru gerðar meiri háttar breytingar á lögum um Seðlabankann árið 1991 og þar áður árið 1986. Í bæði skiptin var um þær þverpólitísk sátt. Sem þekkt er voru breytingarnar nú gerðar í andstöðu við Sjálfstæðisflokkinn.

Fyrir þinginu liggja frumvörp um breytingu á kosningalögunum annars vegar og stjórnarskránni hins vegar. Að þeim standa forystumenn allra flokka fyrir utan Sjálfstæðisflokkinn.

Hálf öld er síðan stjórnarskránni var síðast breytt í óþökk þingflokks. Framsóknarmenn voru þá andvígir breyttri kjördæmaskipan. Síðan hefur stjórnarskránni verið breytt sex sinnum og ávallt í þverpólitískri sátt þó einstakir þingmenn hafi greitt atkvæði gegn breytingum. Á móti kemur hins vegar að rétt fyrir kosningarnar 2007 lögðu formenn þáverandi stjórnarflokka; Geir H. Haarde Sjálfstæðisflokki og Jón Sigurðsson Framsóknarflokki fram frumvarp um að fært yrði í stjórnarskrá að náttúruauðlindir skyldu vera þjóðareign. Því var vísað til stjórnarskrárnefndar þar sem það dagaði uppi.

bjorn@frettabladid.is