Trymbill sest í leikstjórastól

Kreppan hefur ekki einungis neikvæð áhrif á land og þjóð og virðist sem margir hafi ákveðið að setjast á skólabekk á ný í kjölfar hennar. Frosti Jón Runólfsson, trymbill hljómsveitarinnar Esju, er á meðal þeirra og stundar hann nú nám við Kvikmyndaskóla Íslands og ber því vel söguna.

Frosti lauk nýverið við tökur á lokaverkefni annarinnar sem er stuttmynd með þeim Walter Grímssyni og Lilju Nótt Þórarinsdóttur í aðalhlutverkum. Stuttmyndin fjallar um ungan, fráskilinn mann sem strýkur úr fangelsi til þess að geta eytt tíma með dóttur sinni á afmælisdegi hennar.

Myndin var frumsýnd við góðar undirtektir á skemmtistaðnum Boston fyrir nokkru síðan og nú vonast Frosti til þess að koma henni til sýningar á RIFF-kvikmyndahátíðinni. Frosti Jón sá ekki einungis um að leikstýra myndinni heldur skrifaði einnig handritið að henni og sá um alla eftirvinnslu. „Það er gott að hafa grunnþekkingu á þessu öllu en næst fæ ég fagfólk í þessi störf. Það er nær djöfullegt að klippa í sundur eitthvað sem þú hefur skrifað og skotið sjálfur. Ég átti allavegana erfitt með það, ég á það líka til að klippa efnið mitt eins og tónlistarmyndband sem er ekki töff, segja þeir sem þekkja til."

Hugmyndina að handritinu segist Frosti hafa fengið þegar hann sat og horfði á ljósmynd af fjöldamorðingjanum John Wayne Gacy, en sá var þekktur fyrir að klæða sig upp sem trúð og skemmta vinum sínum. Í kvikmyndinni klæðist aðalhetjan sem trúður til að komast undan lögreglunni. Frosti Jón segir tímann verða að leiða það í ljós hvað hann geri í framtíðinni, „Vonandi mun bransinn taka mér opnum örmum þegar ég útskrifast, þangað til er ég stoltur nemi Ferris Bueller style."