Ögmundur er mættur í uppvaskið

Ögmundur Jónasson, heilbrigðisráðherra og þingmaður Vinstri grænna, býst ekki við því að breytingar verði á forystu flokksins fyrir næstu þingkosningar. Þetta sagði Ögmundur í Sprengisandi á Bylgjunni í morgun. Hann segir jafnframt að forysta flokksins njóti mjög mikils stuðnings.

„Við myndum mjög sterka heild þessi hópur. Höfum mikil tengsl við grasrótina og lítum ekki eins mikið til foringja eins og menn gera í Sjálfstæðisflokknum þar sem menn koma sér undir hælnum og gera það sem foringjarnir segja," sagði Ögmundur.

Hann sagði að Vinstri grænir hefðu fengið um 14% atkvæða í síðustu kosningum. Margt benti til þess að fylgið myndi aukast núna og endurnýjun yrði hjá Vinstri grænum þess vegna.

Ögmundur sagði að það væri mikil breyting fyrir flokkinn að verða hluti af ríkisstjórn. Það væru alger umskipti að reyna að hafa áhrif úr stjórnarandstöðunni annars vegar og sitja í ráðuneyti þar sem ákvarðanir eru teknar hins vegar. Hann hefði viljað að aðstæður í þjóðfélaginu væru öðruvísi þegar að Vinstri grænir urðu aðilar að ríkisstjórn. Það hefði verið mikil veisla á Íslandi að undanförnu en Vinstri grænir væru eiginlega bara komnir í uppvaskið.

Ögmundur sagði að niðurskurður í heilbrigðiskerfinu væri óhjákvæmilegur. Hann hefði hins vegar reynt að setja sér skýr markmið í þessum niðurskurði. Reynt yrði að draga ekki úr aðgengi sjúklinga. Reynt yrði að láta þetta ekki bitna á starfsfólki og reynt yrði að hlífa því starfsfólki sem hefði lágar tekjur og miðlungstekjur á kostnað þeirra sem bera mikið úr býtum.

Í niðurskurði yrði reynt að horfa á að lækka lyfjakostnað og reyna að ná sátt um nauðsynlegar skipulagsbreytingar.