Villa í tölvukerfi fæðingaorlofssjóðs

Símalínur fæðingarorlofssjóðsins hafa verið rauðglóandi í dag og í gær. Hátt í helmingur þeirra sem fá greiðslur úr fæðingarorlofssjóði fengu mun minna en þeir gerðu ráð fyrir um mánaðamótin. Ekki var gert ráð fyrir persónuafslætti hjá fólkinu, vegna villu í tölvukerfi. Til stendur að leiðrétta þetta síðdegis.

Tæplega 5000 foreldrar fá greiðslu úr fæðingarorlofssjóði í þessum mánuði. Sjóðurinn greiddi út í gær, á sjötta hundrað milljóna króna til fólksins. Hins vegar urðu margir mjög undrandi á greiðslunni; hún var í mörgum tilvikum mun lægri en gert hafði verið ráð fyrir. Það skýrist af því að vegna villu í tölvukerfi, segir sjóðurinn, nýttist persónuafslátturinn ekki, og fullur skattur var tekinn af fólki; hátt í 1.500 manns. Persónuafsláttur nemur ríflega 40.000 krónum á mánuði, svo fólk munar um minna.

Leó Örn Þorleifsson, forstöðumaður sjóðsins, segir að þetta verði lagað í dag og fólki greiddur út persónuafslátturinn. Hann bendir fólki á að fylgjast vel með heimasíðu sjóðsins. Hann segir einnig, aðspurður, að mikið hafi verið hringt til sjóðsins vegna málsins. Tvöfalt fleiri símtöl hafi borist honum í dag og í gær, en á venjulegum degi.