Halldór hættir sem bæjarstjóri á Ísafirði

Á fundi í bæjarmálafélagi Sjálfstæðisflokksins í Ísafjarðarbæ í gærkvöldi tilkynnti Halldór Halldórsson bæjarstjóri Ísafjarðarbæjar og oddviti Sjálfstæðismanna í Ísafjarðarbæ um þá ákvörðun sína að gefa ekki kost á sér sem oddviti og bæjarstjóraefni í næstu sveitarstjórnarkosningum vorið 2010.

„Þessa ákvörðun hef ég fyrir löngu tekið, tók hana í upphafi yfirstandandi kjörtímabils, en þótti rétt að tilkynna mínum flokksfélögum hana í tíma svo hægt verði að stilla upp öflugum lista til áframhaldandi þjónustu fyrir íbúa bæjarins," segir Halldór í yfirlýsingu sem hann sendi fjölmiðlum.



Margt áunnist á tólf árum

Hann segir margt hafa gerst á þeim bráðum tólf árum sem hann hafi starfað sem bæjarstjóri í Ísafjarðarbæ. „Þegar ég tók við störfum vorið 1998 var ég sjötti bæjarstjórinn á sjö ára tímabili. All nokkur órói hafði verið í bæjarmálunum árin á undan," segir Halldór.

Halldór segir mikið hafa verið framkvæmt á þessum árum og þjónusta sveitarfélagsins sé góð og víðtæk. Staða bæjarins sé góð, sérstaklega ef miðað sé við núverandi aðstæður og samanburð við önnur sveitarfélög. Auðveldlega sé hægt að rökstyðja þessa fullyrðingu með samanburði ársreikninga sveitarfélaga.

„Þessi ákvörðun er byggð á því sjónarmiði mínu að ekki sé hollt að vera alltof lengi í einu starfi. Hvorki fyrir einstaklinginn sjálfan né þá sem starfinu er ætlað að þjóna. Að mínu mati gildir þetta sérstaklega um kjörna fulltrúa," segir Halldór.



Ekki hættur í pólitík

Halldór segir að með þessari ákvörðun sé hann ekki að gefa út yfirlýsingu um að nú sé hann hættur í stjórnmálum. „Á hvaða vettvangi ég mun starfa að loknu þessu kjörtímabili verður tíminn að leiða í ljós en tækifærin eru mörg og áhuginn mikill," segir Halldór.